08.003 திருவண்டப்பகுதி

திருச்சிற்றம்பலம்

அண்டப் பகுதியின் உண்டைப் பிறக்கம்
அளப்பருந் தன்மை வளப் பெருங் காட்சி
ஒன்றனுக்கு ஒன்று நின்றெழில் பகரின்
நூற்று ஒரு கோடியின் மேற்பட விரிந்தன
இல்நுழை கதிரின் துன்அணுப் புரையச் 5

சிறிய ஆகப் பெரியோன் தெரியின்
வேதியன் தொகையொடு மாலவன் மிகுதியும்
தோற்றமும் சிறப்பும் ஈற்றொடு புணரிய
மாப்பேர் ஊழியும் நீக்கமும் நிலையும்
சூக்கமொடு தூலத்துச் சூறை மாருதத்து 10

எறியது வளியின்
கொட்கப் பெயர்க்கும் குழகன் முழுவதும்
படைப்போற் படைக்கும் பழையோன் படைத்தவை
காப்போற் காக்கும் கடவுள் காப்பவை
கரப்போன் கரப்பவை கருதாக் 15

கருத்துடைக் கடவுள் திருத்தகும்
அறுவகைச் சமயத்து அறுவகை யோர்க்கும்
வீடுபேறாய் நின்ற விண்ணோர் பகுதி
கீடம் புரையும் கிழவோன் நாள் தொறும்
அருக்கனில் சோதி அமைத்தோன் திருத்தகு 20

மதியில் தண்மை வைத் தோன் திண்திறல்
தீயில் வெம்மை செய்தோன் பொய்தீர்
வானில் கலப்பு வைத்தோன் மேதகு
காலின் ஊக்கம் கண்டோன் நிழல் திகழ்
நீரில் இன்சுவை நிகழ்ந்தோன் வெளிப்பட 25

மண்ணில் திண்மை வைத்தோன் என்று என்று
எனைப் பல கோடி எனைப் பல பிறவும்
அனைத்து அனைத்து அவ்வயின் அடைத்தோன் அஃதான்று
முன்னோன் காண்க முழுதோன் காண்க
தன்நேர் இல்லோன் தானே காண்க 30

ஏனத் தொல் எயிறு அணிந்தோன் காண்க
கானப் புலியுரி அரையோன் காண்க
நீற்றோன் காண்க நினைதொறும் நினைதொறும்
ஆற்றேன் காண்க அந்தோ கெடுவேன்
இன்னிசை வீணையில் இசைந்தோன் காண்க 35

அன்னது ஒன்று அவ்வயின் அறிந்தோன் காண்க
பரமன் காண்க பழையோன் காண்க
பிரமன்மால் காணாப் பெரியோன் காண்க
அற்புதன் காண்க அநேகன் காண்க
சொற்பதங் கடந்த தொல்லோன் காண்க 40

சித்தமும் செல்லாச் சேட்சியன் காண்க
பத்தி வலையில் படுவோன் காண்க
ஒருவன் என்னும் ஒருவன் காண்க
விரிபொழில் முழுதாய் விரிந்தோன் காண்க
அணுத்தரும் தன்மையில் ஐயோன் காண்க 45

இணைப்பரும் பெருமையில் ஈசன் காண்க
அரியதில் அரிய அரியோன் காண்க
மருவி எப்பொருளும் வளர்ப்போன் காண்க
நூல் உணர்வு உணரா நுண்ணியோன் காண்க
மேலோடு கீழாய் விரிந்தோன் காண்க 50

அந்தமும் ஆதியும் அகன்றோன் காண்க
பந்தமும் வீடும் படைப்போன் காண்க
நிற்பதுஞ் செல்வதும் ஆனோன் காண்க
கற்பமும் இறுதியும் கண்டோன் காண்க
யாவரும் பெற உறும் ஈசன் காண்க 55

தேவரும் அறியாச் சிவனே காண்க
பெண்ஆண் அலிஎனும் பெற்றியன் காண்க
கண்ணால் யானும் கண்டேன் காண்க
அருள்நனி சுரக்கும் அமுதே காண்க
கருணையின் பெருமை கண்டேன் காண்க 60

புவனியில் சேவடி தீண்டினன் காண்க
சிவன் என யானும் தேறினன் காண்க
அவன் எனை ஆட்கொண்டு அருளினன் காண்க
குவளைக் கண்ணி கூறன் காண்க
அவளுந் தானும் உடனே காண்க 65

பரமா னந்தப் பழங் கடலதுவே
கருமா முகிலின் தோன்றித்
திருவார் பெருந்துறை வரையில் ஏறித்
திருத்தகு மின்ஒளி திசைதிசை விரிய
ஐம்புலப் பந்தனை வாளரவிரிய 70

வெம் துயர்க் கோடை மாத்தலை கரப்ப
நீடு எழில் தோன்றி வாள் ஒளி மிளிர
எம்தம் பிறவியில் கோபம் மிகுத்து
முரசு ஏறிந்து மாப்பெருங் கருணையில் முழங்கிப்
பூப்புரை அஞ்சலி காந்தள் காட்ட 75

எஞ்சா இன்னருள் நுண்துளி கொள்ளச்
செஞ்சுடர் வெள்ளம் திசைதிசை தெவிட்ட வரையுறக்
கேதக் குட்டம் கையற வோங்கி
இருமுச் சமயத்து ஒரு பேய்த் தேரினை
நீர்நசை தரவரும் நெடுங்கண் மான்கணம் 80

தவப்பெரு வாயிடைப் பருகித் தளர்வொடும்
அவப்பெருந் தாபம் நீங்காது அசைந்தன
ஆயிடை வானப் பேரியாற்று அகவயின்
பாய்ந்து எழுந்து இன்பப் பெருஞ்சுழி கொழித்துச்
சுழித்து எம்பந்தமாக் கரைபொருது அலைத்திடித்து 85

ஊழ் ஊழ் ஓங்கிய நங்கள்
இருவினை மாமரம் வேர் பறித்து எழுந்து
உருவ அருள்நீர் ஓட்டா அருவரைச்
சந்தின் வான்சிறை கட்டி மட்டவிழ்
வெறிமலர்க் குளவாய் கோலி நிறையகில் 90

மாப்புகைக் கரைசேர் வண்டுடைக் குளத்தின்
மீக்கொள மேல்மேல் மகிழ்தலின் நோக்கி
அருச்சனை வயலுள் அன்புவித்து இட்டுத்
தொண்ட உழவர் ஆரத் தந்த
அண்டத்து அரும்பெறல் மேகன் வாழ்க 95

கரும்பணக் கச்சைக் கடவுள் வாழ்க
அரும்தவர்க்கு அருளும் ஆதி வாழ்க
அச்சம் தவிர்த்த சேவகன் வாழ்க
நிச்சலும் ஈர்த்தாட் கொள்வோன் வாழ்க
சூழ்இரும் துன்பம் துடைப்போன் வாழ்க 100

எய்தினர்க்கு ஆர்அமுது அளிப்போன் வாழ்க
கூர்இருள் கூத்தொடு குனிப்போன் வாழ்க
பேர்அமைத் தோளி காதலன் வாழ்க
ஏதிலர்க்கு ஏதில்எம் இறைவன் வாழ்க
காதலர்க்கு எய்ப்பினில் வைப்பு வாழ்க 105

நச்சு அரவு ஆட்டிய நம்பன் போற்றி
பிச்சு எமை ஏற்றிய பெரியோன் போற்றி
நீற்றொடு தோற்ற வல்லோன் போற்றி நாற்றிசை
நடப்பன நடாஅய்க் கிடப்பன கிடாஅய்
நிற்பன நிறீஇச் 110

சொல்பதம் கடந்த தொல்லோன்
உள்ளத் துணர்ச்சியிற் கொள்ளவும் படாஅன்
கண்முதல் புலனாற் காட்சியும் இல்லோன்
விண்முதல் பூதம் வெளிப்பட வகுத்தோன்
பூவில் நாற்றம் போன்றுயர்ந் தெங்கும் 115

ஒழிவற நிறைந்து மேவிய பெருமை
இன்று எனக்கு எளிவந்து அருளி
அழிதரும் ஆக்கை ஒழியச்செய்த ஒண்பொருள்
இன்றெனக் கெளிவந்து இருந்தனன் போற்றி
அளிதரும் ஆக்கை செய்தோன் போற்றி 120

ஊற்றிருந் துள்ளங் களிப்போன் போற்றி
ஆற்றா இன்பம் அலர்ந்தலை செய்யப்
போற்றா ஆக்கையைப் பொறுத்தல் புகலேன்
மரகதக் குவாஅல் மாமணிப் பிறக்கம்
மின்ஒளி கொண்ட பொன்னொளி திகழத் 125

திசைமுகன் சென்று தேடினர்க்கு ஒளித்தும்
முறையுளி ஒற்றி முயன்றவர்க்கு ஒளித்தும்
ஒற்றுமை கொண்டு நோக்கும் உள்ளத்து
உற்றவர் வருந்த உறைப்பவர்க்கு ஒளித்தும்
மறைத்திறம் நோக்கி வருந்தினர்க்கு ஒளித்தும் 130

இத்தந் திரத்தில் காண்டும் என்று இருந்தோர்க்கு
அத்தந் திரத்தில் அவ்வயின் ஒளித்தும்
முனிவு அற நோக்கி நனிவரக் கௌவி
ஆணெனத் தோன்றி அலியெனப் பெயர்ந்து
வாள்நுதல் பெண்என ஒளித்தும் சேண்வயின் 135

ஐம்புலன் செலவிடுத்து அருவரை தொறும்போய்த்
துற்றவை துறந்த வெற்று உயிர் ஆக்கை
அருந்தவர் காட்சியுள் திருந்த ஒளித்தும்
ஒன்று உண்டில்லை யென்றறி வொளித்தும்
பண்டே பயில்தொறும் இன்றே பயில்தொறும் 140

ஒளிக்கும் சோரனைக் கண்டனம்
ஆர்மின் ஆர்மின் நாண்மலர்ப் பிணையலின்
தாள்தளை இடுமின் சுற்றுமின் சூழ்மின்
தொடர்மின் விடேன்மின்
பற்றுமின் என்றவர் பற்றுமுற்று ஒளித்தும் 145

தன்நேர் இல்லோன் தானே ஆன தன்மை
என் நேர் அனையோர் கேட்கவந்து இயம்பி
அறைகூவி ஆட்கொண்டருளி
மறையோர் கோலம் காட்டி அருளலும்
உலையா அன்பு என்பு உருக ஓலமிட்டு 150

அலைகடல் திரையில் ஆர்த்து ஆர்த்து ஓங்கித்
தலை தடுமாறா வீழ்ந்துபுரண் டலறிப்
பித்தரின் மயங்கி மத்தரின் மதித்து
நாட்டவர் மருளவும் கேட்டவர் வியப்பவும்
கடக்களிறு ஏற்றாத் தடப்பெரு மதத்தின் 155

ஆற்றேன் ஆக அவயவம் சுவைதரு
கோற்றேன் கொண்டு செய்தனன்
ஏற்றார் மூதூர் எழில்நகை எரியின்
வீழ்வித்து ஆங்கு அன்று அருட்பெருந் தீயின்
அடியோம் அடிக்குடில் 160

ஒருத்தரும் வழாமை யொடுக்கினன்
தடக்கையின் நெல்லிக் கனியெனக் காயினன்
சொல்லுவது அறியேன் வாழி முறையோ
தரியேன் நாயேன் தான் எனைச் செய்தது
தெரியேன் ஆஆ செத்தேன் அடியேற்கு 165

அருளியது அறியேன் பருகியும் ஆரேன்
விழுங்கியும் ஒல்ல கில்லேன்
செழுந்தண் பாற்கடல் திரைபுரை வித்து
உவாக்கடல் நள்ளும்நீர் உள்அகம் ததும்ப
வாக்கு இறந்து அமுதம் மயிர்க்கால் தோறும் 170

தேக்கிடச் செய்தனன் கொடியேன் ஊன்தழை
குரம்பை தோறும் நாய் உடல் அகத்தே
குரம்பைகொண்டு இன்தேன் பாய்த்தி நிரம்பிய
அற்புதம் ஆன அமுத தாரைகள்
எற்புத் துளைதொறும் ஏற்றினன் உருகுவது 175

உள்ளம் கொண்டோர் உருச்செய் தாங்கு எனக்கு
அள் ஊறு ஆக்கை அமைத்தனன் ஒள்ளிய
கன்னற் கனிதேர் களிறு எனக் கடைமுறை
என்னையும் இருப்பது ஆக்கினன் என்னில்
கருணை வான்தேன் கலக்க 180

அருளொடு பரா அமுது ஆக்கினன்
பிரமன் மால் அறியாப் பெற்றி யோனே.

திருச்சிற்றம்பலம்

aNtap pakuthiyin uNtaip piRakkam,
aLappuarum thanmai, vaLap perum kaatchi
onRanukku onRu nhinRa elzhil pakarin
nhuuRRu oru koatiyin maeRpata virinhthana;
il nhulzai kathirin thun aNup puraiya,

chiRiya aakap periyoan. theriyin
vaethiyan thokaiyotu maal avan mikuthiyum,
thoaRRamum, chiRappum, eeRRotu puNariya
maap paer uulzhiyum, nheekkamum, nhilaiyum,
chuukkamotu, thuulaththu, chuuRai maaruthaththu

eRiyathu vaLiyin
kotkap peyarkkum kulzhakan: mulzhuvathum
pataippoan pataikkum palzaiyoan; pataiththavai
kaappoan kaakkum katavuL; kaappavai
karappoan; karappavai karuthaak

karuththutaik katavuL; thiruththakum
aRuvakaich chamayaththu aRuvakaiyoarkkum
veetu paeRu aay, nhinRa viNNaோr pakuthi
keetam puraiyum kilzhavoan; nhaaLthoRum
arukkanil choothi amaiththoan; thiruththaku

mathiyil thaNmai vaiththoan; thiN thiRal
theeyil vemmai cheythoan; poy theer
vaanil kalappu vaiththoan; maethaku
kaalil uukkam kaNtoan; nhilzhal thikalzh
nheeril inchuvai nhikalzhnhthoan; veLippata

maNNil thiNmai vaiththoan enRu enRu,
enaip pala koati, enaip pala piRavum,
anaiththuanaiththu, avvayin ataiththoan. aqthaanRu
munnoan kaaNka! mulzhuthoan kaaNka!
than nhaer illoan thaanae kaaNka!

aenath thol eyiRu aNinhthoan kaaNka!
kaanap puli uri araiyoan kaaNka!
nheeRRoan kaaNka! nhinaithoRum, nhinaithoRum,
aaRRaen kaaNka! anhthoa! ketuvaen!
in ichai veeNaiyil ichainhthoan kaaNka!

annathu onRu avvayin aRinhthoan kaaNka!
paraman kaaNka! palzaiyoan kaaNka!
piraman, maal, kaaNaap periyoan kaaNka!
aRputhan kaaNka! anhaekan kaaNka!
choal patham katanhtha tholloan kaaNka!

chiththamum chellaach chaetchiyan kaaNka!
paththi valaiyil patuvoan kaaNka!
oruvan ennum oruvan kaaNka!
viri polzhil mulzhuthaay virinhthoan kaaNka!
aNuth tharum thanmaiyil aiyoan kaaNka!

iNaippu arum perumai eechan kaaNka!
ariyathil ariya ariyoan kaaNka!
maruvi ep poruLum vaLarppoan kaaNka!
nhuul uNarvu uNaraa nhuNNiyoan kaaNka!
maelotu, keelzhaay, virinhthoan kaaNka!

anhthamum, aathiyum, akanRoan kaaNka!
panhthamum, veetum, pataippoan kaaNka!
nhiRpathum, chelvathum, aanoan kaaNka!
kaRpamum, iRuthiyum, kaNtoan kaaNka!
yaavarum peRa uRum eechan kaaNka!

thaevarum aRiyaach chivanae kaaNka!
peN, aaN, ali, enum peRRiyan kaaNka!
kaNNaal yaanum kaNtaen kaaNka!
aruL nhani churakkum amuthae kaaNka!
karuNaiyin perumai kaNtaen kaaNka!

puvaniyil chaevati theeNtinan kaaNka!
chivan ena yaanum thaeRinan kaaNka!
avan enai aatkoNtu aruLinan kaaNka!
kuvaLaik kaNNi kuuRan kaaNka!
avaLum, thaanum, utanae kaaNka!

parama aananhthap palzham katal athuvae
karu maa mukilin thoanRi,
thiru aar perunhthuRai varaiyil aeRi,
thiruththaku min oLi thichai thichai viriya,
aim pulap panhthanai vaaL aravu iriya,

vem thuyark koatai maath thalai karappa,
nheetu elzhil thoanRi, vaaL oLi miLira,
em tham piRaviyil koapam mikuththu,
murachu eRinhthu, maap perum karuNaiyin mulzhanGki,
puup purai aGnchali kaanhthaL kaatta,

eGnchaa in aruL nhuN thuLi koLLa,
chem chutar veLLam thichai thichai thevitta, varai uRak
kaethak kuttam kaiyaRa oanGki,
iru much chamayaththu oru paeyththaerinai,
nheer nhachai tharavarum, nhetum kaN, maan kaNam

thavap peru vaayitaip paruki, thaLarvotum,
avap perum thaapam nheenGkaathu achainhthana;
aayitai, vaanap paer yaaRRu akavayin
paaynhthu elzhunhthu, inpap perum chulzhi kolzhiththu,
chulzhiththu, em panhtha maak karai poruthu, alaiththu, itiththu,

uulzh uulzh oanGkiya nhanGkaL
iru vinai maa maram vaer paRiththu, elzhunhthu
uruva, aruL nheer oattaa, aru varaich
chanhthin vaan chiRai katti, mattu avilzh
veRi malark kuLavaay koali, nhiRai akil

maap pukaik karai chaer vaNtu utaik kuLaththin
meekkoLa, mael mael makilzhthalin, nhoakki,
aruchchanai vayaluL anpu viththu ittu,
thoNta ulzhavar aarath thanhtha
aNtaththu arum peRal maekan, vaalzhka!

karum paNak kachchaik katavuL, vaalzhka!
arum thavarkku aruLum aathi, vaalzhka!
achcham thavirththa chaevakan, vaalzhka!
nhichchalum eerththu aatkoLvoan, vaalzhka!
chuulzh irum thunpam thutaippoan, vaalzhka!

eythinarkku aar amuthu aLippoan, vaalzhka!
kuur iruL kuuththotu kunippoan, vaalzhka!
paer amaith thoaLi kaathalan, vaalzhka!
aethilarkku aethil em iRaivan, vaalzhka!
kaathalarkku eyppinil vaippu, vaalzhka!

nhachchu aravu aattiya nhampan, poaRRi!
pichchu emai aeRRiya periyoan, poaRRi!
nheeRRotu thoaRRa valloan, poaRRi nhaal thichai
nhatappana nhataaay, kitappana kitaaay,
nhiRpana nhiReeich

choal patham katanhtha tholloan;
uLLaththu uNarchchiyil koLLavum pataaan;
kaN muthal pulanaal kaatchiyum illoan;
viN muthal puutham veLippata vakuththoan;
puuvil nhaaRRam poanRu uyarnhthu, enGkum

olzhivu aRa nhiRainhthu, maeviya perumai;
inRu enakku eLivanhthu, aruLi,
alzhitharum aakkai olzhiyach cheytha oN poruL;
inRu enakku eLivanhthu, irunhthanan poaRRi!
aLitharum aakkai cheythoan, poaRRi!

uuRRirunhthu uLLam kaLippoan, poaRRi!
aaRRaa inpam alarnhthu alai cheyya,
poaRRaa aakkaiyaip poRuththal pukalaen:
marakathak kuvaaal, maa maNip piRakkam,
min oLi koNta pon oLi thikalzha,

thichaimukan chenRu thaetinarkku oLiththum;
muRaiyuLi oRRi muyanRavarkku oLiththum;
oRRumai koNtu nhoakkum uLLaththu
uRRavar varunhtha, uRaippavarkku oLiththum;
maRaith thiRam nhoakki varunhthinarkku oLiththum;

ith thanhthiraththil kaaNtum enRu irunhthoarkku,
ath thanhthiraththil, avvayin, oLiththum;
munivu aRa nhoakki, nhani varak kowvi,
aaN enath thoanRi, ali enap peyarnhthu,
vaaL nhuthal peN ena oLiththum; chaeN vayin,

aim pulan chela vituththu, aru varaithoRum poay,
thuRRavai thuRanhtha veRRu uyir aakkai
arum thavar kaatchiyuL thirunhtha oLiththum;
onRu uNtu, illai, enRa aRivu oLiththum;
paNtae payilthoRum, inRae payilthoRum,

oLikkum chooranaik kaNtanam;
aarmin! aarmin! nhaaL malarp piNaiyalil
thaaL thaLai itumin!
chuRRumin! chuulzhmin! thotarmin! vitaenmin!
paRRumin!’ enRavar paRRu muRRu oLiththum;

than nhaer illoan thaanae aana thanmai
en nhaer anaiyaar kaetka vanhthu iyampi,
aRai kuuvi, aatkoNtaruLi,
maRaiyoar koalam kaatti aruLalum;
ulaiyaa anpu enpu uruka, oalam ittu,

alai katal thiraiyin aarththu aarththu oanGki,
thalai thatumaaRaa veelzhnhthu, puraNtu alaRi,
piththarin mayanGki, maththarin mathiththu,
nhaattavar maruLavum, kaettavar viyappavum,
katak kaLiRu aeRRaath thatap peru mathaththin

aaRRaen aaka, avayavam chuvaitharu
koal thaen koNtu cheythanan;
aeRRaar muuthuur elzhil nhakai eriyin
veelzhviththaanGku, anRu,
aruL perum theeyin atiyoam atik kutil

oruththarum valzhaamai otukkinan;
thatak kaiyin nhellikkani enakku aayinan:
choalluvathu aRiyaen; vaalzhi! muRaiyoa?
thariyaen nhaayaen; thaan enaich cheythathu
theriyaen; aa! aa! cheththaen; atiyaeRku

aruLiyathu aRiyaen; parukiyum aaraen;
vilzhunGkiyum ollakillaen:
chelzhum, thaN paal katal thirai puraiviththu,
uvaak katal nhaLLum nheer uL akam thathumpa,
vaakku iRanhthu, amutham, mayirkkaalthoaRum,

thaekkitach cheythanan; kotiyaen uun thalzai
kurampaithoaRum, nhaay utal akaththae
kurampu koNtu, in thaen paayththinan; nhirampiya
aRputhamaana amutha thaaraikaL,
eRputh thuLaithoRum, aeRRinan; urukuvathu

uLLam koNtu oar uruch cheythaanGku, enakku
aLLuuRu aakkai amaiththanan; oLLiya
kannal kani thaer kaLiRu ena, kataimuRai
ennaiyum iruppathu aakkinan; ennil
karuNai vaanthaen kalakka

aruLothu paravamu thaakkinan
piramanmaal ariyaap peRRiyoanae. (182)