ருஷிருவாச ।
த்ரிகு³ணா தாமஸீ தே³வீ ஸாத்த்விகீ யா த்ரிதோ⁴தி³தா ।
ஸா ஶர்வா சண்டி³கா து³ர்கா³ ப⁴த்³ரா ப⁴க³வதீர்யதே ॥ 1 ॥
யோக³நித்³ரா ஹரேருக்தா மஹாகாளீ தமோகு³ணா ।
மது⁴கைடப⁴நாஶார்த²ம் யாம் துஷ்டாவாம்பு³ஜாஸந꞉ ॥ 2 ॥
த³ஶவக்த்ரா த³ஶபு⁴ஜா த³ஶபாதா³ஞ்ஜநப்ரபா⁴ ।
விஶாலயா ராஜமாநா த்ரிம்ஶல்லோசநமாலயா ॥ 3 ॥
ஸ்பு²ரத்³த³ஶநத³ம்ஷ்ட்ரா ஸா பீ⁴மரூபாபி பூ⁴மிப ।
ரூபஸௌபா⁴க்³யகாந்தீநாம் ஸா ப்ரதிஷ்டா² மஹாஶ்ரியாம் ॥ 4 ॥
க²ட்³க³பா³ணக³தா³ஶூலஶங்க²சக்ரபு⁴ஶுண்டி³ப்⁴ருத் ।
பரிக⁴ம் கார்முகம் ஶீர்ஷம் நிஶ்சோதத்³ருதி⁴ரம் த³தௌ⁴ ॥ 5 ॥
ஏஷா ஸா வைஷ்ணவீ மாயா மஹாகாளீ து³ரத்யயா ।
ஆராதி⁴தா வஶீகுர்யாத் பூஜாகர்துஶ்சராசரம் ॥ 6 ॥
ஸர்வதே³வஶரீரேப்⁴யோ யா(ஆ)விர்பூ⁴தா(அ)மிதப்ரபா⁴ ।
த்ரிகு³ணா ஸா மஹாலக்ஷ்மீ꞉ ஸாக்ஷாந்மஹிஷமர்தி³நீ ॥ 7 ॥
ஶ்வேதாநநா நீலபு⁴ஜா ஸுஶ்வேதஸ்தநமண்ட³லா ।
ரக்தமத்⁴யா ரக்தபாதா³ நீலஜங்கோ⁴ருருந்மதா³ ॥ 8 ॥
ஸுசித்ரஜக⁴நா சித்ரமால்யாம்ப³ரவிபூ⁴ஷணா ।
சித்ராநுலேபநா காந்திரூபஸௌபா⁴க்³யஶாலிநீ ॥ 9 ॥
அஷ்டாத³ஶபு⁴ஜா பூஜ்யா ஸா ஸஹஸ்ரபு⁴ஜா ஸதீ ।
ஆயுதா⁴ந்யத்ர வக்ஷ்யந்தே த³க்ஷிணாத⁴꞉கரக்ரமாத் ॥ 10 ॥
அக்ஷமாலா ச கமலம் பா³ணோ(அ)ஸி꞉ குலிஶம் க³தா³ ।
சக்ரம் த்ரிஶூலம் பரஶு꞉ ஶங்கோ² க⁴ண்டா ச பாஶக꞉ ॥ 11 ॥
ஶக்திர்த³ண்ட³ஶ்சர்ம சாபம் பாநபாத்ரம் கமண்ட³லு꞉ ।
அலங்க்ருதபு⁴ஜாமேபி⁴ராயுதை⁴꞉ கமலாஸநாம் ॥ 12 ॥
ஸர்வதே³வமயீமீஶாம் மஹாலக்ஷ்மீமிமாம் ந்ருப ।
பூஜயேத் ஸர்வலோகாநாம் ஸ தே³வாநாம் ப்ரபு⁴ர்ப⁴வேத் ॥ 13 ॥
கௌ³ரீதே³ஹாத்ஸமுத்³பூ⁴தா யா ஸத்த்வைககு³ணாஶ்ரயா ।
ஸாக்ஷாத்ஸரஸ்வதீ ப்ரோக்தா ஶும்பா⁴ஸுரநிப³ர்ஹிணீ ॥ 14 ॥
த³தௌ⁴ சாஷ்டபு⁴ஜா பா³ணாந்முஸலம் ஶூலசக்ரப்⁴ருத் ।
ஶங்க²ம் க⁴ண்டாம் லாங்க³ளம் ச கார்முகம் வஸுதா⁴தி⁴ப ॥ 15 ॥
ஏஷா ஸம்பூஜிதா ப⁴க்த்யா ஸர்வஜ்ஞத்வம் ப்ரயச்ச²தி ।
நிஶும்ப⁴மதி²நீ தே³வீ ஶும்பா⁴ஸுரநிப³ர்ஹிணீ ॥ 16 ॥
இத்யுக்தாநி ஸ்வரூபாணி மூர்தீநாம் தவ பார்தி²வ ।
உபாஸநம் ஜக³ந்மாது꞉ ப்ருத²கா³ஸாம் நிஶாமய ॥ 17 ॥
மஹாலக்ஷ்மீர்யதா³ பூஜ்யா மஹாகாளீ ஸரஸ்வதீ ।
த³க்ஷிணோத்தரயோ꞉ பூஜ்யே ப்ருஷ்ட²தோ மிது²நத்ரயம் ॥ 18 ॥
விரஞ்சி꞉ ஸ்வரயா மத்⁴யே ருத்³ரோ கௌ³ர்யா ச த³க்ஷிணே ।
வாமே லக்ஷ்ம்யா ஹ்ருஷீகேஶ꞉ புரதோ தே³வதாத்ரயம் ॥ 19 ॥
அஷ்டாத³ஶபு⁴ஜா மத்⁴யே வாமே சாஸ்யா த³ஶாநநா ।
த³க்ஷிணே(அ)ஷ்டபு⁴ஜா லக்ஷ்மீர்மஹதீதி ஸமர்சயேத் ॥ 20 ॥
அஷ்டாத³ஶபு⁴ஜா சைஷா யதா³ பூஜ்யா நராதி⁴ப ।
த³ஶாநநா சாஷ்டபு⁴ஜா த³க்ஷிணோத்தரயோஸ்ததா³ ॥ 21 ॥
காலம்ருத்யூ ச ஸம்பூஜ்யௌ ஸர்வாரிஷ்டப்ரஶாந்தயே ।
யதா³ சாஷ்டபு⁴ஜா பூஜ்யா ஶும்பா⁴ஸுரநிப³ர்ஹிணீ ॥ 22 ॥
நவாஸ்யா꞉ ஶக்தய꞉ பூஜ்யாஸ்ததா³ ருத்³ரவிநாயகௌ ।
நமோ தே³வ்யா இதி ஸ்தோத்ரைர்மஹாலக்ஷ்மீம் ஸமர்சயேத் ॥ 23 ॥
அவதாரத்ரயார்சாயாம் ஸ்தோத்ரமந்த்ராஸ்ததா³ஶ்ரயா꞉ ।
அஷ்டாத³ஶபு⁴ஜா சைஷா பூஜ்யா மஹிஷமர்தி³நீ ॥ 24 ॥
மஹாலக்ஷ்மீர்மஹாகாளீ ஸைவ ப்ரோக்தா ஸரஸ்வதீ ।
ஈஶ்வரீ புண்யபாபாநாம் ஸர்வலோகமஹேஶ்வரீ ॥ 25 ॥
மஹிஷாந்தகரீ யேந பூஜிதா ஸ ஜக³த்ப்ரபு⁴꞉ ।
பூஜயேஜ்ஜக³தாம் தா⁴த்ரீம் சண்டி³காம் ப⁴க்தவத்ஸலாம் ॥ 26 ॥
அர்க்⁴யாதி³பி⁴ரளங்காரைர்க³ந்த⁴புஷ்பைஸ்ததா²க்ஷதை꞉ ।
தூ⁴பைர்தீ³பைஶ்ச நைவேத்³யைர்நாநாப⁴க்ஷ்யஸமந்விதை꞉ ॥ 27 ॥
ருதி⁴ராக்தேந ப³லிநா மாம்ஸேந ஸுரயா ந்ருப ।
ப்ரணாமாசமநீயேந சந்த³நேந ஸுக³ந்தி⁴நா ॥ 28 ॥
ஸகர்பூரைஶ்ச தாம்பூ³லைர்ப⁴க்திபா⁴வஸமந்விதை꞉ ।
வாமபா⁴கே³(அ)க்³ரதோ தே³வ்யாஶ்சி²ந்நஶீர்ஷம் மஹாஸுரம் ॥ 29 ॥
பூஜயேந்மஹிஷம் யேந ப்ராப்தம் ஸாயுஜ்யமீஶயா ।
த³க்ஷிணே புரத꞉ ஸிம்ஹம் ஸமக்³ரம் த⁴ர்மமீஶ்வரம் ॥ 30 ॥
வாஹநம் பூஜயேத்³தே³வ்யா த்⁴ருதம் யேந சராசரம் ।
[* குர்யாச்ச ஸ்தவநம் தீ⁴மாம்ஸ்தஸ்யா ஏகாக்³ரமாநஸ꞉ । *]
தத꞉ க்ருதாஞ்ஜலிர்பூ⁴த்வா ஸ்துவீத சரிதைரிமை꞉ ॥ 31 ॥
ஏகேந வா மத்⁴யமேந நைகேநேதரயோரிஹ ।
சரிதார்த⁴ம் து ந ஜபேஜ்ஜபஞ்சி²த்³ரமவாப்நுயாத் ॥ 32 ॥
ஸ்தோத்ரமந்த்ரை꞉ ஸ்துவீதேமாம் யதி³ வா ஜக³த³ம்பி³காம் ।
ப்ரத³க்ஷிணநமஸ்காரான் க்ருத்வா மூர்த்⁴நி க்ருதாஞ்ஜலி꞉ ॥ 33 ॥
க்ஷமாபயேஜ்ஜக³த்³தா⁴த்ரீம் முஹுர்முஹுரதந்த்³ரித꞉ ।
ப்ரதிஶ்லோகம் ச ஜுஹுயாத் பாயஸம் திலஸர்பிஷா ॥ 34 ॥
ஜுஹுயாத் ஸ்தோத்ரமந்த்ரைர்வா சண்டி³காயை ஶுப⁴ம் ஹவி꞉ ।
நமோ நம꞉ பதை³ர்தே³வீம் பூஜயேத் ஸுஸமாஹித꞉ ॥ 35 ॥
ப்ரயத꞉ ப்ராஞ்ஜலி꞉ ப்ரஹ்வ꞉ ப்ராணாநாரோப்ய சாத்மநி ।
ஸுசிரம் பா⁴வயேத்³தே³வீம் சண்டி³காம் தந்மயோ ப⁴வேத் ॥ 36 ॥
ஏவம் ய꞉ பூஜயேத்³ப⁴க்த்யா ப்ரத்யஹம் பரமேஶ்வரீம் ।
பு⁴க்த்வா போ⁴கா³ன் யதா²காமம் தே³வீஸாயுஜ்யமாப்நுயாத் ॥ 37 ॥
யோ ந பூஜயதே நித்யம் சண்டி³காம் ப⁴க்தவத்ஸலாம் ।
ப⁴ஸ்மீக்ருத்யாஸ்ய புண்யாநி நிர்த³ஹேத் பரமேஶ்வரீ ॥ 38 ॥
தஸ்மாத் பூஜய பூ⁴பால ஸர்வலோகமஹேஶ்வரீம் ।
யதோ²க்தேந விதா⁴நேந சண்டி³காம் ஸுக²மாப்ஸ்யஸி ॥ 39 ॥
இதி வைக்ருதிகம் ரஹஸ்யம் ஸம்பூர்ணம் ॥
Vaikruthika Rahasyam
r̥ṣiruvāca |
triguṇā tāmasī dēvī sāttvikī yā tridhōditā |
sā śarvā caṇḍikā durgā bhadrā bhagavatīryatē || 1 ||
yōganidrā harēruktā mahākālī tamōguṇā |
madhukaiṭabhanāśārthaṁ yāṁ tuṣṭāvāmbujāsanaḥ || 2 ||
daśavaktrā daśabhujā daśapādāñjanaprabhā |
viśālayā rājamānā triṁśallōcanamālayā || 3 ||
sphuraddaśanadaṁṣṭrā sā bhīmarūpāpi bhūmipa |
rūpasaubhāgyakāntīnāṁ sā pratiṣṭhā mahāśriyām || 4 ||
khaḍgabāṇagadāśūlaśaṅkhacakrabhuśuṇḍibhr̥t |
parighaṁ kārmukaṁ śīrṣaṁ niścōtadrudhiraṁ dadhau || 5 ||
ēṣā sā vaiṣṇavī māyā mahākālī duratyayā |
ārādhitā vaśīkuryāt pūjākartuścarācaram || 6 ||
sarvadēvaśarīrēbhyō yā:’:’virbhūtā:’mitaprabhā |
triguṇā sā mahālakṣmīḥ sākṣānmahiṣamardinī || 7 ||
śvētānanā nīlabhujā suśvētastanamaṇḍalā |
raktamadhyā raktapādā nīlajaṅghōrurunmadā || 8 ||
sucitrajaghanā citramālyāmbaravibhūṣaṇā |
citrānulēpanā kāntirūpasaubhāgyaśālinī || 9 ||
aṣṭādaśabhujā pūjyā sā sahasrabhujā satī |
āyudhānyatra vakṣyantē dakṣiṇādhaḥkarakramāt || 10 ||
akṣamālā ca kamalaṁ bāṇō:’siḥ kuliśaṁ gadā |
cakraṁ triśūlaṁ paraśuḥ śaṅkhō ghaṇṭā ca pāśakaḥ || 11 ||
śaktirdaṇḍaścarma cāpaṁ pānapātraṁ kamaṇḍaluḥ |
alaṅkr̥tabhujāmēbhirāyudhaiḥ kamalāsanām || 12 ||
sarvadēvamayīmīśāṁ mahālakṣmīmimāṁ nr̥pa |
pūjayēt sarvalōkānāṁ sa dēvānāṁ prabhurbhavēt || 13 ||
gaurīdēhātsamudbhūtā yā sattvaikaguṇāśrayā |
sākṣātsarasvatī prōktā śumbhāsuranibarhiṇī || 14 ||
dadhau cāṣṭabhujā bāṇānmusalaṁ śūlacakrabhr̥t |
śaṅkhaṁ ghaṇṭāṁ lāṅgalaṁ ca kārmukaṁ vasudhādhipa || 15 ||
ēṣā sampūjitā bhaktyā sarvajñatvaṁ prayacchati |
niśumbhamathinī dēvī śumbhāsuranibarhiṇī || 16 ||
ityuktāni svarūpāṇi mūrtīnāṁ tava pārthiva |
upāsanaṁ jaganmātuḥ pr̥thagāsāṁ niśāmaya || 17 ||
mahālakṣmīryadā pūjyā mahākālī sarasvatī |
dakṣiṇōttarayōḥ pūjyē pr̥ṣṭhatō mithunatrayam || 18 ||
virañciḥ svarayā madhyē rudrō gauryā ca dakṣiṇē |
vāmē lakṣmyā hr̥ṣīkēśaḥ puratō dēvatātrayam || 19 ||
aṣṭādaśabhujā madhyē vāmē cāsyā daśānanā |
dakṣiṇē:’ṣṭabhujā lakṣmīrmahatīti samarcayēt || 20 ||
aṣṭādaśabhujā caiṣā yadā pūjyā narādhipa |
daśānanā cāṣṭabhujā dakṣiṇōttarayōstadā || 21 ||
kālamr̥tyū ca sampūjyau sarvāriṣṭapraśāntayē |
yadā cāṣṭabhujā pūjyā śumbhāsuranibarhiṇī || 22 ||
navāsyāḥ śaktayaḥ pūjyāstadā rudravināyakau |
namō dēvyā iti stōtrairmahālakṣmīṁ samarcayēt || 23 ||
avatāratrayārcāyāṁ stōtramantrāstadāśrayāḥ |
aṣṭādaśabhujā caiṣā pūjyā mahiṣamardinī || 24 ||
mahālakṣmīrmahākālī saiva prōktā sarasvatī |
īśvarī puṇyapāpānāṁ sarvalōkamahēśvarī || 25 ||
mahiṣāntakarī yēna pūjitā sa jagatprabhuḥ |
pūjayējjagatāṁ dhātrīṁ caṇḍikāṁ bhaktavatsalām || 26 ||
arghyādibhiralaṅkārairgandhapuṣpaistathākṣataiḥ |
dhūpairdīpaiśca naivēdyairnānābhakṣyasamanvitaiḥ || 27 ||
rudhirāktēna balinā māṁsēna surayā nr̥pa |
praṇāmācamanīyēna candanēna sugandhinā || 28 ||
sakarpūraiśca tāmbūlairbhaktibhāvasamanvitaiḥ |
vāmabhāgē:’gratō dēvyāśchinnaśīrṣaṁ mahāsuram || 29 ||
pūjayēnmahiṣaṁ yēna prāptaṁ sāyujyamīśayā |
dakṣiṇē purataḥ siṁhaṁ samagraṁ dharmamīśvaram || 30 ||
vāhanaṁ pūjayēddēvyā dhr̥taṁ yēna carācaram |
[* kuryācca stavanaṁ dhīmāṁstasyā ēkāgramānasaḥ | *]
tataḥ kr̥tāñjalirbhūtvā stuvīta caritairimaiḥ || 31 ||
ēkēna vā madhyamēna naikēnētarayōriha |
caritārdhaṁ tu na japējjapañchidramavāpnuyāt || 32 ||
stōtramantraiḥ stuvītēmāṁ yadi vā jagadambikām |
pradakṣiṇanamaskārān kr̥tvā mūrdhni kr̥tāñjaliḥ || 33 ||
kṣamāpayējjagaddhātrīṁ muhurmuhuratandritaḥ |
pratiślōkaṁ ca juhuyāt pāyasaṁ tilasarpiṣā || 34 ||
juhuyāt stōtramantrairvā caṇḍikāyai śubhaṁ haviḥ |
namō namaḥ padairdēvīṁ pūjayēt susamāhitaḥ || 35 ||
prayataḥ prāñjaliḥ prahvaḥ prāṇānārōpya cātmani |
suciraṁ bhāvayēddēvīṁ caṇḍikāṁ tanmayō bhavēt || 36 ||
ēvaṁ yaḥ pūjayēdbhaktyā pratyahaṁ paramēśvarīm |
bhuktvā bhōgān yathākāmaṁ dēvīsāyujyamāpnuyāt || 37 ||
yō na pūjayatē nityaṁ caṇḍikāṁ bhaktavatsalām |
bhasmīkr̥tyāsya puṇyāni nirdahēt paramēśvarī || 38 ||
tasmāt pūjaya bhūpāla sarvalōkamahēśvarīm |
yathōktēna vidhānēna caṇḍikāṁ sukhamāpsyasi || 39 ||
iti vaikr̥tikaṁ rahasyaṁ sampūrṇam ||