வள்ளி தாலாட்டு

வள்ளி என்றால் வள்ளி மலை மேல் படரும் வள்ளி
கொடியில் கிடந்து வள்ளி கூவி அழும் போது
வனத்து குறவர்களாம் மான் பிடிக்கும் வேடர்களாம்
குழந்தை குரல் கேட்டு குறவேடர் ஓடிவந்து {1}

மதலை குரல் கேட்டு மான்வேடர் ஓடிவந்து
வாரி எடுத்து வண்ண மடியில் வைத்து
தூக்கி எடுத்து சொர்ண மடியில் வைத்து
மண்துடைத்து மடியில் வைத்து வள்ளியென்று பேரும் வைத்து {2}

வடிவேல் துணையென்று வளர்த்தார் வனத்தினிலே!
ஆராரோ ஆரிரரோ என் கண்ணே ஆராரோ ஆராரோ
காடுவெட்டித் தீக்கொளுத்தி மேடுபள்ளம் செப்பனிட்டு
தின்னத் தினைவிதைத்து – வள்ளி தேமொழியை காவல் வைத்தார் {3}

அறுக்கத் தினைவிதைத்து – வள்ளி அருங்கிளியைக் காவல் வைத்தார்
உழக்குத் தினைவிதைத்து – வள்ளி ஓடிக் கிளிவிரட்டி
நாழித் தினைவிதைத்து – வள்ளி நடந்து கிளிவிரட்டி
துருணித் தினைவிதைத்து – வள்ளி கூவிக் கிளிவிரட்டி {4}

பதக்குத் தினைவிதைத்து – வள்ளி பாடிக் கிளிவிரட்டி
ஆலோலம் என்று சொல்லி – வள்ளி அழகாய்க் கிளிவிரட்டி
அறுக்கப் பதமாச்சே – வள்ளி அருங்கிளியால் காத்ததினை!
ஆராரோ ஆரிரரோ என் கண்ணே ஆராரோ ஆராரோ {5}

சுப்பையா உன்றனுக்குச் தோதான வள்ளியென்று
ஷண்முகா உந்தனுக்குச் சரியான வள்ளியென்று
வீணைக்கொண்ட நாரதரும் வேலவர்க்குச் சொல்லிவிட்டார்
தினைப்புனமும் காத்து வள்ளி திகைத்து நிற்கும் வேளையிலே {6}

வனத்திருக்கும் வேடரைப்போல் – சுப்பையா வந்தாராம் மாலையிட
தேனும் திணைமாவும் தெவிட்டாத வேலவரும்
பாலும் தினைமாவும் பசியாற வந்தாராம்
புள்ளிமான் புகுந்ததென்று – சுப்பையா புகுந்தார் தினைப்புனத்தே {7}

வள்ளிமான் வந்ததென்று – சுப்பையா வந்தார் வனத்தினிலே
வெள்ளிமலை தெற்கே விராலிமலை தென்மேற்கே
கல்லுமலைக் குள்ளிருந்து கதிர்வேலர் ஓடிவந்து
வள்ளிதனை மாலையிட வந்தார் வனத்தருகே! {8}

ஆராரோ ஆரிரரோ என் கண்ணே ஆராரோ ஆராரோ
வண்டாடப் பூமலர – வள்ளி வனங்காக்கக் கண்டாரோ ?
வள்ளி அழகுக்கும் – வள்ளி வலதுகைத் தேமலுக்கும்
கன்னத்து மஞ்சளுக்கும் – சுப்பையா கண்டாசை கொண்டாரோ ! {9}

உட்கழுத்து மஞ்சளுக்கும் – சுப்பையா உள்ளாசைப் பட்டாரோ !
கூந்தல் அழகுக்குச் – சுப்பையா குறவேசம் ஆனாரோ ?
ஓடினாள் வள்ளி ஒளிந்தால் வனந்தேடி
தேடினார் வேல்முருகர் – வள்ளி திருவடியைக் காணாமல் {10}

வருந்தினார் முருகர் – வள்ளி வடிவழகைக் காணாமல் !
ஆராரோ ஆரிரரோ என் கண்ணே ஆராரோ ஆராரோ
நல்ல கிழவனைப்போல் – சுப்பையா நடித்தாராம் தினைப்புனத்தில்
மெத்தப் பசிக்குதென்று – சுப்பையா வித்தை மெத்தச் செய்தாராம் {11}

தேனும் தினைமாவும் – வள்ளி சேர்த்துக் கொடுத்தாளாம்
தாக மெடுக்குதென்று சுப்பையா சாலங்கள் செய்தாராம்
தேன்குடிக்கத் தந்தாளாம் தேன்மொழியாள் வள்ளியரும்
அதையும் குடிக்காமல் – சுப்பையா அழைத்தாராம் சுனையருகே {12}

கூட்டி நடந்தாளாம் கொம்பனையாள் வள்ளியரும்
ஆட்டங்கள் ஆடிச் – சுப்பையா ஆரணங்கைக் கூவினராம்
ஏதோ சிரமமென்று எடுத்தணைத்தால் தோகையவள்
கன்னி கை கொடுத்தாளாம் – சுப்பையா தோளோ டணைத்தாராம் {13}

காட்டிலே வாழுகின்ற கன்னி வள்ளி நாயகிக்கு
எதைக்கண்டால் பயமென்றார் ஏந்திழையால் வள்ளியர்க்குக்
கரடிப்புலி சிங்கமென்றால் கடுகளவும் பயமறியாள்
ஆனையென்று சொன்னால்தான் அதிகப் பயமுண்டு {14}

கொடிபடர்ந்த வள்ளியர்க்குக் கொண்டுவந்தார் வெள்ளானை
காட்டானைக் காட்டி சுப்பையா கலியாணம் செய்துகொண்டார்
அண்ணாவைத் தானினைத்து ஆரணங்கை மாலைகொண்டார்
கொண்டார் மனைவியாய்க் கூட்டிவந்தார் தன்னருகே {15}

கிள்ளு வளையலிட்டுச் – சுப்பையா கிளிமொழியை மாலையிட்டார்
பச்சை வளையலிட்டு – சுப்பையா ஆரணங்கை மாலையிட்டார்
மாலையிட்ட மன்னவராம் – சுப்பையா பசுங்கிளியை மாலையிட்டார்
சேலை விழியிலிட்டாள் சுப்பையா தேர்ந்தெடுத்த பெண்சாதி {16}

வள்ளிதெய் வானையுடன் சுப்பையா வருவார் மயில்மீது
அள்ளி அருள்பொழிவார் சுப்பையா அனைத்துலகும் இன்பமுறும்! (2)
ஆராரோ ஆரிரரோ என் கண்ணே ஆராரோ ஆராரோ
ஆராரோ ஆரிரரோ என் கண்ணே ஆராரோ ஆராரோ {17}